ፕረዚደንት ኢሳይያስ፡ ኣብ ሽርክነትን ወፍርን ዘተኰረ ርክባት፡ ምስ ዝተፈላለዩ ሰበ-ስልጣን ናይ ወፍሪ ትካላት ኣካዪዱ

ኣብ ቻይና ወግዓዊ ምብጻሕ ዝፍጽም ዘሎ ፕረዚደንት ኢሳይያስ ኣፈወርቂ፡ ሎሚ ናብ ኣገደስቲ ቦታታትን ትካላትን ልምዓት ዑደት ብምክያድ፡ ኣብ ሽርክነትን ወፍርን ዘተኰረ ርክባት፡ ምስ ዝተፈላለዩ ሰበ-ስልጣን ናይተን ትካላት ኣካዪዱ። ፕረዚደንት ኢሳይያስ፡ ብኣካየድትን ሰራሕተኛታትን ተሰንዩ፡ ኣብ ምፍራይን ምምስራሕን ቃንጥሻ ዝነጥፍ ኩባንያ ባዮቴክኖሎጂ፡ ከምኡ’ውን ኣብ ምፍራይ ንፋሳዊ፡ ጸሓያዊ፡ ሃይድሮጅናዊ፡ ተተካኢ ጸዓት፡ ኒኲሌሳዊ ጸዓትን ተሓዳሲ ጸዓትን ዘጠቓልል ምዕቡል መሳርሒታት ዘፍሪ ትካል ‘ዶንግፋን’ ኣብ ዝበጽሓሉ፡ ዝዓጠቕኦ ቴክኖሎጂ፡ ኣሰራርሓአን፡ ኣፍራይነተንን ዓቕመንን ተዓዚቡን መግለጺ ተዋሂብዎን።

ኣቦ-መንበር ትካል ናውቲ ጸዓት ‘ዶንግፋን’ ሚስተር ዩ ፐይጀን፡ ኤርትራ ብዘለዋ ብልጫታትን ጸጋታትን ንቻይና ኣገዳሲት መሓዛን መሻርኽትን ምዃና ብምሕባር፡ ከም ኣካል ናይ’ቲ ንልዕሊ 80 ሃገራት ዝህብዎ ኣገልግሎት፡ ኣብ ኤርትራ ወፍሪ ከካይዱ ድልዋት ምህላዎም ገሊጹ።

ፕረዚደንት ኢሳይያስ ብወገኑ፡ በጺሖሞ ንዘለዉ ምዕባለ ድሕሪ ምድናቕ፡ ብዘይ ኣቕርቦት ጸዓት ዝሰምር ምዕባለ ስለዘየለ፡ እታ ትካል ኣብ ኤርትራ ክትግበር ኣብ ዝሕሰብ ዘሎ መደባት ልምዓት ብምኽሪ፡ ስልጠናን ወፍሪን ክትሳተፍ እቲ ባብ ርሕው ከምዝዀነ ብምርግጋጽ፡ ዕድመ ኣቕሪቡ።

ብድሕሪ’ዚ ፕረዚደንት ኢሳይያስን ምስኡ ዝተጓዕዘ ላዕለዋይ ጉጅለ ልኡኽን፡ ኣካል ዓለማዊ ባህላዊ ውርሻ ኣብ ዝኾነ መስኖኣዊ ፕሮጀክት ዱጅያን ግያን’ዮም በጺሖም። እዚ ኣብ 256 ቅድሚ ልደተ ክርስቶስ ዝተሃንጸ ፕሮጀክት መስኖ፡ ኣብ ዓለም ልዑል ብቕዓት ምህንድስና ካብ ዘለዎም ተመሳሰልቲ ፕሮጀክትታት’ዩ። ብዘይካ’ዚ፡ ፓንዳታት ዝራብሓሉ ሃገራዊ ፓርክ ብምብጻሕ፡ ሜላታት ክንክንን ዕቃቤን ተፈጥሮ ተዓዚቦምን መብርሂ ተዋሂቦምን።

ፕረዚደንት ኢሳይያስን ምስኡ ዝተጓዕዙ ሚኒስተራትን፡ ኣብ ህንጸት ቢንቶታት፡ ጽርግያታት፡ ዘመናዊ መንገዲ ባቡርን ዕደናን ዝነጥፍን ኣብ 250 ዓለምለኻዊ ፕሮጀክትታት ማያዊ ጸዓት፡ ምዕቡል ስርዓተ መጓዓዝያን ጽርግያታትን፡ እንተላይ ኣብ ኤርትራ ኣብ ፕሮጀክት ኮሉሊ ዝነጥፍ ዘሎ ‘ትካል ወፍሪ ሹዳዎ’ ኣብ ዝበጽሑሉ፡ ምስ ኣቦ-መንበር ናይ’ታ ትካል ሚስተር ታንግ ዮንግ ዘትዮም።

ኣቦ-መንበር ትካል ‘ትካል ወፍሪ ሹዳዎ’ ሚስተር ታንግ ዮንግ ኣብ ዘስመዖ ቃል፡ “ብሓገዝ መንግስቲ ኤርትራ፡ ኣብ’ዚ ዓመት’ዚ እቲ ዝዓበየ ወፍሪ ኮሉሊ ክነበግስ ኢና” ድሕሪ ምባል፡ እዚ ኣብ ሞንጎ ኤርትራን ቻይናን እቲ ዝዓበየን ተጨባጥን ዝዀነ ወፍሪ፡ ንዝምድናታት ክልቴአን ሃገራት ዝያዳ ዘዕምቚ ከምዝኸውን ምሉእ ምትእምማን ከምዘለዎ ገሊጹ።

ፕረዚደንት ኢሳይያስ ብወገኑ፡ ንዝተገብረሉ ድሙቕ ኣቀባብላ ድሕሪ ምምስጋን፡ ኣብ እዋናዊ ፕሮጀክትታት ምዝራብ ኣገዳሲ ምዃኑ ብምጥቃስ፡ ንዕደና ኮሉሊን ካልእ ኣብ’ቲ ከባቢ ዝርከብ ጸጋታትን ዘገልግል፡ ካብ ቦታ ዕደና ናብ ዝቐረበ ወደብ ዝዝርጋሕ መንገዲ ባቡር ብዝቐልጠፈ ክህነጽ ከምዘለዎ ጸቒጡ ኣዘኻኺሩ።

እቲ ዝህነጽ መንገዲ ባቡር፡ መራኸቢታት፡ ትሕተ-ቅርጺ ወደባትን ጽርግያታትን፡ ካብ 60 ክሳብ 80 ዓመታት ዘገልግልን ዓለምለኻዊ ደረጃ ዝሓለወን ክኸውን ከምዝግባእ ዘዘኻኸረ ፕረዚደንት ኢሳይያስ፡ “ንሕና ጥረ ነገራት ከምዘለዎ ክንሰድድ ኣይኰንናን። ኩሉ ነገር ተመስሪሑን ተደማሪ ዋጋ ተወሲኽዎን ጥራይ’ዩ ክስደድ ዘለዎ” ክብል ኣስሚሩሉ።

ኣካየድቲ ‘ትካል ወፍሪ ሹዳዎ’ ብወገኖም፡ ንኹሉ ነገር ድልዋት ምህላዎምን ኣብ ሓጺር እዋን ስራሕ ከምዝጅምሩን ኣረጋጊጾም።